Germaniya kansleri Angela Merkel Rossiyani Sharqiy Yevropadagi vaziyatni beqarorlashtirishda ayblab, Moskva buning uchun qo‘shni mamlakatlar hududiy yaxlitligiga daxl qilishdan ham tap tortmayotganini ma’lum qildi, deb xabar bermoqda “Korrespondent.net”. Uning so‘zlariga ko‘ra, Ukraina, Gruziya va Moldova Yevropa Ittifoqi bilan assotsiatsiya to‘g‘risidagi kelishuvni imzolagach, Rossiya ularga qiyinchiliklar tug‘dirmoqda.
“Moldova ko‘p yillardan buyon Dnestrbo‘yi hududi bilan mojarodan, Gruziya Abxaziya va Janubiy Osetiya muammosidan qiynalmoqda. Ukraina Qrim anneksiyasi va mamlakat sharqidagi janglarni boshidan kechirishiga to‘g‘ri kelmoqda. Bundan tashqari, Rossiya o‘z manfaatlari yo‘lida Bolqonning g‘arbiy qismidagi ba’zi davlatlarni ham iqtisodiy va siyosiy qaramlikka duchor qilmoqchi”, − dedi Merkel.
Shuningdek, Germaniya kansleri Rossiya Latviya, Litva va Estoniya bilan mojaroga kiradigan taqdirda NATO ittifoq shartnomasida ko‘zda tutilganidek Boltiqbo‘yi mamlakatlariga ko‘mak beradi. Boltiq urushi masalasi hozirda mavjud emasligini tan olgan Merkel NATO ayni paytda mintaqa mamlakatlarining havo hududini himoya qilishga ko‘maklashayotganini hamda bu borada Polsha va Daniya bilan hamkorlik qilayotganini ma’lum qildi.
Izoh (0)