Sony Pictures Entertainment kompaniyasiga uyushtirilgan kiberhujumni “Tinchlik soqchilari” xakerlar guruhi o‘z bo‘yniga oldi, deya xabar bermoqda “Gazeta.ru”. Ushbu hujum natijasida korporatsiyaning hali efirga chiqmagan filmlari internetda tarqalib ketgan edi.
Bundan tashqari, ushbu kompaniya bilan hamkorlik qilgan Gollivud yulduzlarining shaxsiy ma’lumotlari ham ochiq manbalarda paydo bo‘ldi.
Ushbu hujum yuzasidan olib borilayotgan tergov ishi davomida Federal qidiruv byurosi 2013-yil martida Janubiy Koreya banklari va telekompaniyalariga hujum uyushtirishda qo‘llanilgan virus qoldiqlarini topgan. Shu tariqa, “Tinchlik soqchilari” Shimoliy Koreya xakerlar guruhiga aloqador bo‘lishi mumkinligi aniqlandi.
Sony vakillari so‘zlariga ko‘ra, kiberhujum Kim Chen Inning qatl etilishi haqidagi “Intervyu” filmi premyerasiga bir oy qolganida sodir bo‘lgan. Shimoliy Koreyaning kiberhujumga aloqadorligini inkor qilib hodisadan ancha vaqt o‘tibgina mamlakat hukumati rasmiy bayonot berdi. Ertasi kuni esa Sony xodimlari tahdidli maktub oldi. Unda Sony Pictures yo‘q qilib tashlanishi haqida aytiladi.
Ayni paytda FQB kiberhujumga KXDR xakerlarining aloqadorligi haqidagi versiyani asosiylardan biri sifatida ko‘rib chiqmoqda.
Eslatib o‘tamiz, xakerlar hujumidan Silvestr Stallone, rejissyor Jad Apatou, avstraliyalik aktrisa Rebel Uilson aziyat chekkan. Qayd etilishicha, tarmoqqa yulduzlarning ijtimoiy himoya raqamlari chiqarilgan. Bundan tashqari, kompaniyaning jami 47 mingdan ortiq hozirgi va sobiq xodimlarining ijtimoiy himoya raqamlari internetda tarqalib ketgan.
Kim Chen Inning qatl etilishi to‘g‘risidagi “Intervyu” deb nomlangan film syujetida AQSh televideniyesida ishlaydigan ikki muxbir Kim Chen Indan intervyu olish imkoniga ega bo‘ladi. Ular Shimoliy Koreyaga ketish safaridan avval maxfiy xizmat tomonidan KXDR rahbarini o‘ldirish haqida buyruq oladi.
Avvalroq KXDR amaldorlari ushbu filmni tanqid qilib, agar film Amerika ekranlarida ko‘rsatiladigan bo‘lsa, ular AQShning barcha kinoteatrlarni yo‘q qilish bilan tahdid qilgan edi.
Izoh (0)