Ukraina Xavfsizlik xizmati (UXX) Checheniston rahbari Ramzan Qodirovga nisbatan jinoiy ish qo‘zg‘adi. Bu haqda UXX rahbari maslahatchisi Markiyan Lubkovskiy o‘zining Facebook’dagi sahifasida ma’lum qildi, deb yozadi “TASS”.
“UXX Rossiya Federatsiyasi fuqarosi Ramzan Qodirov tomonidan Ukraina xalq deputatlariga qarata terroristik tahdid qo‘llanilgani yuzasidan jinoiy ish ochgani, shuningdek tahdidlar yo‘naltirilgan Ukraina parlamenti a’zolariga nisbatan xavfsizlik choralarini kuchaytirganini xabar qilaman”, — deb yozdi Lubkovskiy.
Eslatib o‘tamiz, 4-dekabrga o‘tar kechasi Checheniston poytaxti Grozniyga terrorchilar hujum uyushtirgach, Ukraina deputatlarining ba’zilari jangarilarni yoqlab chiqdi. Bunday bayonotlardan Ramzan Qodirovning jahli chiqib, respublika harbiylariga ushbu deputatlarni tutib, Chechenistonga keltirishni buyurdi. Qodirovning aytishicha, ularning Grozniydagi terrorchilik harakatlariga aloqadorligini tekshirib ko‘rish kerak.
Izoh (0)