Toshkentda shaxsiy avtomobillar egalariga hujum qilib, ularni talagan va mashinalarini olib qo‘ygan jinoyatchilar sud qilindi, deya xabar bermoqda “Inson va qonun” gazetasi.
Akmal Nosirov va Vosit Hamroyev o‘zlarining qabih ishlarini Toshkent shahridagi “Oloy” bozori qarshisidagi yo‘ldan boshladi. Ular 2014-yilning 25-aprelidan 26-apreliga o‘tar kechasi bozor oldidagi ko‘chaga taksi to‘xtatish maqsadida yo‘lga chiqadi. Ularning oldiga Botir Shodiyorov boshqaruvidagi “Lasetti” avtomashinasi kelib to‘xtaydi. Haydovchi bilan go‘yoki yo‘lovchi sifatida gaplashgan “yo‘lovchi”lar taksichiga Qibray tumanidagi May qishlog‘iga olib borib qo‘yishni so‘rab, xizmat haqiga esa 20000 so‘m va’da qiladi. Shundan so‘ng taksichi aytilgan manzil tomon harakatlanadi, manzilga yaqinlashib qolganda “mijoz”lar o‘zlariga qulay, hech kim bo‘lmagan joyda haydovchiga to‘xtatishni buyuradi. Avtomashinani yo‘l chetiga to‘xtatgan Botir kutilmagan hamladan nima qilishini bilmay qoladi.
Zo‘ravonlar Botirni mashinadan uloqtirib, o‘zlari “Lasetti”ni shahar tomon buradi va Akmalga tegishli bo‘lgan garajga olib keladi. U yerda avtomashina egasiga tegishli bo‘lgan 2500 AQSh dollari, 2 dona uyali aloqa vositasi, avtomashina hujjatlari va ehtiyot qismlarini o‘zlashtirib, mashinani Yunusobod tuman Laylakobod ko‘chasiga olib borib tashlaydi. Birinchi ishini muvaffaqiyatli tugatgan “ishbilarmon”lar mashinadan yechib olingan ehtiyot qismlarni bozorda sotib, cho‘ntagini qappaytiradi.
Qisqa muddatda mo‘may daromad topishga ulgurgan Akmal va Vosit ikkinchi jinoiy harakatini ham kechiktirib o‘tirmaydi. Jinoyatchilar navbatdagi o‘ljasini qo‘lga kiritish uchun yana “Oloy” bozori qarshisidagi yo‘lga borib taksi to‘xtatishadi. Bu gal ularning oldiga Nodir Mansurov ixtiyoridagi “Neksiya” kelib to‘xtaydi. Haydovchiga eski manzil, ya’ni May qishlog‘iga olib borib qo‘yish tushuntirilib, yo‘l haqini esa ikki hissa to‘lashini aytadi. Manzilga yetib borgan jinoyatchilar Nodir Mansurovni ham oldingi “Lasetti” egasining ahvoliga solishadi. “Neksiya”ni esa yana o‘sha Akmalning garajiga olib boradi. Garaj ichida har galgidek kerakli qismlari o‘zlashtiriladi hamda mashina egasining uyali aloqa vositasi va pullar ham e’tibordan chetda qoldirilmadi. Cho‘ntagini qappaytirgan jinoyatchilar bu bilan ham o‘z qilmishlariga chek qo‘yishni xayoliga keltirmadi. Aksincha, ular navbatdagi jinoiy harakat rejasini tuzishdi.
Bu safar ularning qarmog‘iga Said Nabiyev boshqaruvidagi “Lasetti“ avtomashinasi ilindi. Mirzo Ulug‘bek tumanidagi “Buxoro” kafesi oldidan Qibray tumanidagi eski manzilgacha gaplashgan jinoyatchilar manzilga yaqinlashgach, bu “Lasetti” egasini ham do‘pposlab mashinadan uloqtirib tashlaydi. Mashina esa har doimgi garajga olib kelinib, kerakli qismlar olinadi. Mashina esa “TashGRES” mavzesidagi 2-sonli maktabgacha ta’lim muassasasi yonidagi garajlar oldida qoldirib ketiladi.
Qisqa muddatda ishi yurishib ketgan jinoyatchilarning qilmishlari uzoqqa cho‘zilmadi. Unga Qibray tuman ichki ishlar bo‘limi tomonidan nuqta qo‘yildi. Qora kursiga olib kelingan jinoyatchilarga esa sud tomonidan hukm o‘qildi.
Izoh (0)