Тошкентда шахсий автомобиллар эгаларига ҳужум қилиб, уларни талаган ва машиналарини олиб қўйган жиноятчилар суд қилинди, дея хабар бермоқда «Инсон ва қонун» газетаси.
Акмал Носиров ва Восит Ҳамроев ўзларининг қабиҳ ишларини Тошкент шаҳридаги «Олой» бозори қаршисидаги йўлдан бошлади. Улар 2014 йилнинг 25 апрелидан 26 апрелига ўтар кечаси бозор олдидаги кўчага такси тўхтатиш мақсадида йўлга чиқади. Уларнинг олдига Ботир Шодиёров бошқарувидаги «Ласетти» автомашинаси келиб тўхтайди. Ҳайдовчи билан гўёки йўловчи сифатида гаплашган «йўловчи»лар таксичига Қибрай туманидаги Май қишлоғига олиб бориб қўйишни сўраб, хизмат ҳақига эса 20000 сўм ваъда қилади. Шундан сўнг таксичи айтилган манзил томон ҳаракатланади, манзилга яқинлашиб қолганда «мижоз»лар ўзларига қулай, ҳеч ким бўлмаган жойда ҳайдовчига тўхтатишни буюради. Автомашинани йўл четига тўхтатган Ботир кутилмаган ҳамладан нима қилишини билмай қолади.
Зўравонлар Ботирни машинадан улоқтириб, ўзлари «Ласетти»ни шаҳар томон буради ва Акмалга тегишли бўлган гаражга олиб келади. У ерда автомашина эгасига тегишли бўлган 2500 АҚШ доллари, 2 дона уяли алоқа воситаси, автомашина ҳужжатлари ва эҳтиёт қисмларини ўзлаштириб, машинани Юнусобод туман Лайлакобод кўчасига олиб бориб ташлайди. Биринчи ишини муваффақиятли тугатган «ишбилармон»лар машинадан ечиб олинган эҳтиёт қисмларни бозорда сотиб, чўнтагини қаппайтиради.
Қисқа муддатда мўмай даромад топишга улгурган Акмал ва Восит иккинчи жиноий ҳаракатини ҳам кечиктириб ўтирмайди. Жиноятчилар навбатдаги ўлжасини қўлга киритиш учун яна «Олой» бозори қаршисидаги йўлга бориб такси тўхтатишади. Бу гал уларнинг олдига Нодир Мансуров ихтиёридаги «Нексия» келиб тўхтайди. Ҳайдовчига эски манзил, яъни Май қишлоғига олиб бориб қўйиш тушунтирилиб, йўл ҳақини эса икки ҳисса тўлашини айтади. Манзилга етиб борган жиноятчилар Нодир Мансуровни ҳам олдинги «Ласетти» эгасининг аҳволига солишади. «Нексия»ни эса яна ўша Акмалнинг гаражига олиб боради. Гараж ичида ҳар галгидек керакли қисмлари ўзлаштирилади ҳамда машина эгасининг уяли алоқа воситаси ва пуллар ҳам эътибордан четда қолдирилмади. Чўнтагини қаппайтирган жиноятчилар бу билан ҳам ўз қилмишларига чек қўйишни хаёлига келтирмади. Аксинча, улар навбатдаги жиноий ҳаракат режасини тузишди.
Бу сафар уларнинг қармоғига Саид Набиев бошқарувидаги «Ласетти« автомашинаси илинди. Мирзо Улуғбек туманидаги «Бухоро» кафеси олдидан Қибрай туманидаги эски манзилгача гаплашган жиноятчилар манзилга яқинлашгач, бу «Ласетти» эгасини ҳам дўппослаб машинадан улоқтириб ташлайди. Машина эса ҳар доимги гаражга олиб келиниб, керакли қисмлар олинади. Машина эса «ТашГРЭС» мавзесидаги 2-сонли мактабгача таълим муассасаси ёнидаги гаражлар олдида қолдириб кетилади.
Қисқа муддатда иши юришиб кетган жиноятчиларнинг қилмишлари узоққа чўзилмади. Унга Қибрай туман ички ишлар бўлими томонидан нуқта қўйилди. Қора курсига олиб келинган жиноятчиларга эса суд томонидан ҳукм ўқилди.
Изоҳ (0)