Qishloq xo‘jalik mahsulotlarini qayta ishlash uchun mo‘ljallangan ixcham uskunalar ishlab chiqarish bo‘yicha Rossiya-O‘zbekiston qo‘shma korxonalarini yaratish ikki davlat o‘rtasida yaqin yillardagi hamkorlikning asosiy yo‘nalishlaridan biri bo‘ladi. Bu haqda O‘zbekiston Savdo-sanoat palatasi raisi Alisher Shayxovga tayanib, “RIA Novosti” xabar berdi.
Shayxovning aytishicha, o‘tgan hafta Toshkentda bo‘lib o‘tgan O‘zbekiston-Rossiya hukumatlararo komissiya majlisi yakunlari bo‘yicha protokol tuzilib, unga Rossiya sanoat va savdo vazirligi hamda Rossiya oziq-ovqat va qayta ishlash uskunalari mashinasozlari ittifoqining O‘zbekiston hududida qishloq xo‘jalik mahsulotlarini qayta ishlash uchun mo‘ljallangan ixcham uskunalar va zamonaviy texnologiyalar ishlab chiqarish bo‘yicha qo‘shma loyihalarni amalga oshirish haqidagi takliflari kiritilgan edi.
“Rossiya tomoni dekabr oxirigacha tegishli takliflarni yuborishni rejalashtirmoqda, dastlabki natijalar 2015-yilning birinchi choragidayoq e’lon qilinishi mumkin”, — deya aniqlik kiritdi Shayxov Toshkentdagi AgroExpo — 2014 xalqaro ko‘rgazmasida.
Izoh (0)