Қишлоқ хўжалик маҳсулотларини қайта ишлаш учун мўлжалланган ихчам ускуналар ишлаб чиқариш бўйича Россия-Ўзбекистон қўшма корхоналарини яратиш икки давлат ўртасида яқин йиллардаги ҳамкорликнинг асосий йўналишларидан бири бўлади. Бу ҳақда Ўзбекистон Савдо-саноат палатаси раиси Алишер Шайховга таяниб, «РИА Новости» хабар берди.
Шайховнинг айтишича, ўтган ҳафта Тошкентда бўлиб ўтган Ўзбекистон-Россия ҳукуматлараро комиссия мажлиси якунлари бўйича протокол тузилиб, унга Россия саноат ва савдо вазирлиги ҳамда Россия озиқ-овқат ва қайта ишлаш ускуналари машинасозлари иттифоқининг Ўзбекистон ҳудудида қишлоқ хўжалик маҳсулотларини қайта ишлаш учун мўлжалланган ихчам ускуналар ва замонавий технологиялар ишлаб чиқариш бўйича қўшма лойиҳаларни амалга ошириш ҳақидаги таклифлари киритилган эди.
«Россия томони декабрь охиригача тегишли таклифларни юборишни режалаштирмоқда, дастлабки натижалар 2015 йилнинг биринчи чорагидаёқ эълон қилиниши мумкин», — дея аниқлик киритди Шайхов Тошкентдаги AgroExpo — 2014 халқаро кўргазмасида.
Изоҳ (0)