22-noyabr, shanba kuni “Paxtakor” va Tbilisining “Dinamo” jamoasi faxriylari Toshkentda o‘rtoqlik o‘yinini o‘tkazadi. Bu haqda Toshkent jamoasi matbuot xizmati xabar berdi.
Uchrashuv Gruziyaning “Dinamo” jamoasi Sobiq Ittifoq chempionatida ilk bor oltin medallarni qo‘lga kiritganiga 50 yil to‘lishi munosabati bilan o‘tkaziladi. 1964-yil “Dinamo” birinchi o‘rin uchun “Paxtakor” stadionida o‘tgan “oltin” o‘yinda “Torpedo”ni 4:1 hisobida mag‘lubiyatga uchratib, o‘zining ilk chempionligini nishonlagan. Ushbu tarixiy voqeani munosib nishonlash maqsadida tbilisiliklarning faxriy futbolchilari Toshkentda “Paxtakor” faxriylari bilan bellashuvda maydonga tushadi.
Toshkentga Gruziya futboli faxriylaridan Vladimir Barkaya, Georgiy Sichinava, Aleksandr Chivadze, Vladimir Gutsayev, Otar Gabeliya, Nukri Kakilashvili va Kaxa Sxadadze tashrif buyuradi. Maydonga tushadigan futbolchilar ro‘yxati esa quyidagicha:
Kaxaber Kaladze, Irakliy Zoidze, Soso Grishikashvili, Levan Kobiashvili, Archil Arveladze, Aleksandr Iashvili, Georgiy Kinkladze, Georgiy Nemsadze, Levan Skitishvili, Mixail Kavelashvili, Gocha Jamarauli, Georgiy Demetradze, Georgiy Anchabadze, David Mudjiri, Murtaz Sheliya, Nutzar Lobjanidze, Mamuka Machavariani, Soso Barkaya.
Tadbirda qatnashish uchun bir necha nafar jurnalist va faxriy muxlislar maxsus reysda Toshkentga tashrif buyuradi. Mehmonlar “Paxtakor-79” jamoasi xotirasini yod etish uchun Botkin qabristonidagi yodgorlik majmuasiga borishlari ko‘zda tutilgan. Gruziyaliklar 21-noyabr kuni poytaxtimizga yetib keladi. 22-noyabr kuni soat 13:30da “Paxtakor” Markaziy stadionida “Paxtakor” va “Dinamo” jamoalari faxriylari o‘rtasida uchrashuv boshlanadi.
O‘yinda “Paxtakor” sharafini jamoa safida turli yillarda to‘p surgan Anvar Rashidov, Aleksey Roshin, Murod Aliyev, Baxtiyor Ashurmatov, Sergey Kovshov, Farhod Magometov, Andrey Miklyayev, Yorqin Nazarov, No‘mon Hasanov, Shuhrat Rahmonqulov, Ravshan Bozorov, Mirjalol Qosimov, Sobir Xodiyev, Gennadiy Denisov, Azamat Abduraimov, Rustam Do‘rmonov, Ja’far Irismetov, Oybek Usmonxo‘jayev, Igor Shkvirin, Shuhrat Maqsudov, Jasur Abduraimov, Muxtor Qurbonov va Baxtiyor Qambaraliyev singari futbolchilar himoya qilishlari kutilmoqda.
Izoh (0)