Bundan bir yil avval Qozon aeroportiga qo‘nish chog‘ida halokatga uchragan “Boing-737” qurbonlari do‘st va qarindoshlari halokat joyiga tashrif buyurib, yodgorlik toshiga gul qo‘yadi. Ularni aeroportga yetkazishga ketadigan xarajatlarni mintaqa hukumati o‘z bo‘yniga oladi, deya xabar bermoqda “TASS” Tatariston transport va yo‘l xo‘jaligi vaziri kotibi Noila Klevleyevaga tayanib.
Respublikadagi barcha pravoslav ibodatxonalarida va masjidlarda marhumlar xotirasiga motam tadbirlari o‘tkaziladi. Ularda Tatariston mitropoliyasi rahbari arxiyepiskop Anastasiy va Tatariston muftiysi Komil Samigullin ishtirok etishi kutilmoqda.
Eslatib o‘tamiz, 2013-yilning 17-noyabr kuni Qozon xalqaro aeroportiga qo‘nish vaqtida Moskvadan uchib kelayotgan “Boing-737” yo‘lovchi samolyoti halokatga uchragan edi. Samolyot “Tatariston” aviakompaniyasiga tegishli bo‘lgan. Reys raqami 363 bo‘lgan “Boing” Moskvaning “Domodedovo” aeroportidan uchib kelayotgan bo‘lgan. Samolyot noqulay ob-havo sharoitida uch marta qo‘nishga harakat qilgan va so‘nggi urinishda aerodromning parvoz maydonida yerga urilgan.
Samolyot bortida 50 kishi, jumladan, olti nafar ekipaj a’zosi va 44 nafar yo‘lovchi bo‘lgan, ularning barchasi halok bo‘lgan.
Izoh (0)