Apple kompaniyasi tasodifan Xitoyning Weibo ijtimoiy tarmog‘idagi rasmiy sahifasida Samsung’ning yangi bukiluvchan smartfoniga oid reklama roligini joylashtirdi. Bu haqda Apple’ga oid yangiliklar, tahlillar va mish-mishlarni yoritishga ixtisoslashgan 9to5Mac nashri xabar berdi.
Kompaniya vakilining so‘zlariga ko‘ra, post ijtimoiy tarmoq kontentini boshqaruvchi xodimlar tomonidan yuzaga kelgan xatolik natijasida paydo bo‘lgan:
“AppleSupport faqat Apple bilan bog‘liq kontentni e’lon qiladi. Bu qanday yuz berganini aniqlash uchun biz Weibo bilan birga ishlamoqdamiz”, deyiladi manbada.
Adashib joylashtirilgan Samsung haqidagi video izohida Apple qurilmalaridagi ota-ona nazorati funksiyasiga bag‘ishlangan matn bor edi:
“Qurilmangizda ota-ona nazoratini sozlab, farzandingizning App Store orqali yuklab olish va xarid qilish so‘rovlarini boshqarishingiz mumkin”, deyilgandi postda.
Apple Support sahifasidagi ushbu post o‘chirib tashlanishidan oldin ijtimoiy tarmoq foydalanuvchilari orasida yashindek tarqaldi. Obunachilar esa hazillashib, yaqinda ishga olingan amaliyotchi tufayli Apple xato qildi, degan izohlarni qoldirdi.
Izoh (0)