Buzzfeed nashri Malayziyaning “Boing”i qiruvchi samolyot tomonidan urib tushirilganiga dalil sifatida keltirilgan sun’iy yo‘ldoshdan olingan surat manbasi deb tanishtirilgan Jorj Bilt bilan bog‘landi, deb yozadi “Meduza”. Biltning aytishicha, u suratni Rossiyaning “Birinchi kanali”da shu haqdagi ko‘rsatuv chiqqanidan so‘ng blogerlar shu rasmni topgan forumdan olgan.
O‘zini 26 yillik stajga ega aviaekspert va MIT bitiruvchisi sifatida tanishtirgan amerikalik haqiqatan ham Rossiya muhandislar ittifoqi vitse-prezidentiga maktub yozib, unga sun’iy yo‘ldosh suratini ilova qilganini tasdiqladi, biroq fotosuratning qayerdan olinganiga ham aniqlik kiritganini aytdi. Biltning o‘zi rasmning haqiqiyligini aniq bilmaydi, ammo shaxsiy xati OAVlarda keng tarqalib ketganiga afsus bildirdi.
Eslatib o‘tamiz, Rossiya “Birinchi kanali”ning 14-noyabr kungi efirida Malayziya “Boing”i go‘yo qiruvchi samolyot tomonidan urib tushirilgani tasvirlangan sun’iy yo‘ldosh surati namoyish etildi. Fotosurat “Odnako” tahliliy dasturida taqdim etilgan. Dasturda ushbu surat “unikal va sensatsion” deb atalgan.
“Meduza”ning qayd etishicha, ushbu surat ilk bor oktabr oyining o‘rtalarida e’lon qilingan, ba’zi foydalanuvchilar esa uning 2014-yil iyulida paydo bo‘lganini ham ta’kidlamoqda.
Izoh (0)