PocketBook kompaniyasi Tayvanning Readmoo brendi bilan hamkorlikda rangli ekranga ega Color Note Joint Edition qurilmasini taqdim etdi. Planshet E‑Ink Kaleido 3 texnologiyasiga asoslangan bo‘lib, 10,3 dyuymli rangli displeyga ega.
Qurilma asosan kitob o‘qish va hujjatlar bilan ishlashni istovchilar uchun mo‘ljallangan. Planshet LCD ekranlarga qaraganda ancha qulay bo‘lib, displeyida shisha qatlam mavjud emas. Bu esa ko‘zlarni charchatmaslik va uzoq foydalangandan so‘ng ham og‘ritmaslik imkonini beradi.
Rangli rejimda planshet ekranning aniqligi 702×936 piksel bo‘lib, 4 096 xil ranglarni tasvirlay oladi. Qora-oq rejimda esa aniqlik 1 404×1 872 pikselda 16 xil kulrang tusi ajrata oladi.
Qurilma bilan birga o‘ta sezuvchan va o‘chirg‘ich funksiyasiga ega Wacom EMR stilusi (elektron ruchka) taqdim etiladi. Planshetning o‘zi esa Android 12 tizimida ishlaydi. U to‘rt yadroli protsessor, 4 GB tezkor xotira va 32 GB doimiy xotiraga ega. Xotirani SD-karta orqali kengaytirish mumkin.
Color Note old qismida yoritgich, Wi‑Fi va Bluetooth mavjud bo‘lib, ePub va PDF kabi turli formatlardagi fayllar bilan ishlaydi. Audiokitoblarni esa maxsus dinamiklar orqali tinglash mumkin. 4 000 mA/soat sig‘imga ega batareya USB‑C porti orqali quvvatlanadi va tez zaryadlash funksiyasini qo‘llab-quvvatlaydi.
Color Note plansheti hozircha faqat Tayvanda sotuvga chiqarilgan, uning narxi 21 ming Tayvan dollari (taxminan 700 AQSH dollari)ni tashkil qiladi.
Izoh (0)