Apple iPhone 7 smartfonining texnik xususiyatlari haqida taxminlar paydo bo‘la boshladi

Apple kompaniyasining keyingi yilda taqdim etilishi mumkin bo‘lgan, ammo hali hatto nomi ham rasman tasdiqlanmagan yangi smartfonining taxminiy xususiyatlari e’lon qilindi. Bu haqda Phonearena.com ma’lumotiga asoslanib “Parol” nashri xabar berdi.

Taxminlarga ko‘ra iPhone 7 deb nomlanadigan ushbu smartfon 5,5 dyuymdan kattaroq displeyga ega bo‘ladi va u mustahkamligi bo‘yicha olmosdan keyingi o‘rinda turadigan sapfir billuridan ishlanadi. Eslatib o‘tish joiz, Apple kompaniyasining ikki oy oldin taqdim etilgan iPhone 6 Plus smartfoni 5,5 dyuymli displeyga ega va u ham sapfir billuri bilan himoyalangan bo‘ladi degan taxminlar mavjud edi. Biroq bunday bo‘lmadi.

Shu bilan birga iPhone 7 smartfonining korpusini ishlab chiqarishda mustahkamroq metalldan foydalaniladi. Bu esa Apple uchun yana bir #Bendgate xeshtegining paydo bo‘lishining oldini olishda yordam berishi mumkin.

Apple iPhone 7 smartfonida to‘rt yadroli Apple A8 protsessori, 14 megapikselli kamera o‘rnatilishi kutilmoqda. Home — asosiy tugmadagi TouchID — barmoq izi sensorining joyi tarixda ilk bor o‘zgartirilishi taxmin qilinmoqda. Ushbu smartfonning avvalgilaridan yana bir farqi esa, uning 256 Gb xotirali turi ham mavjud bo‘lishi mumkinligida.

Shuningdek, “Parol” nashrida quyidagi maqolalarni ham o‘qishingiz mumkin:

• 2014-yilning texnologiyaga oid eng yaxshi selfi suratlari;
• Microsoft o‘z ichida 482 kilometr yo‘lni tasvirlagan yangi reklama roligini taqdim etdi;
• Ovozini o‘chirish uchun matematik misollarni yechish zarur bo‘lgan budilnik dasturi taqdim etildi.