Apple компаниясининг кейинги йилда тақдим этилиши мумкин бўлган, аммо ҳали ҳатто номи ҳам расман тасдиқланмаган янги смартфонининг тахминий хусусиятлари эълон қилинди. Бу ҳақда Phonearena.com маълумотига асосланиб «Пароль» нашри хабар берди.
Тахминларга кўра iPhone 7 деб номланадиган ушбу смартфон 5,5 дюймдан каттароқ дисплейга эга бўлади ва у мустаҳкамлиги бўйича олмосдан кейинги ўринда турадиган сапфир биллуридан ишланади. Эслатиб ўтиш жоиз, Apple компаниясининг икки ой олдин тақдим этилган iPhone 6 Plus смартфони 5,5 дюймли дисплейга эга ва у ҳам сапфир биллури билан ҳимояланган бўлади деган тахминлар мавжуд эди. Бироқ бундай бўлмади.
Шу билан бирга iPhone 7 смартфонининг корпусини ишлаб чиқаришда мустаҳкамроқ металлдан фойдаланилади. Бу эса Apple учун яна бир #Bendgate хештегининг пайдо бўлишининг олдини олишда ёрдам бериши мумкин.
Apple iPhone 7 смартфонида тўрт ядроли Apple А8 процессори, 14 мегапикселли камера ўрнатилиши кутилмоқда. Home — асосий тугмадаги TouchID — бармоқ изи сенсорининг жойи тарихда илк бор ўзгартирилиши тахмин қилинмоқда. Ушбу смартфоннинг аввалгиларидан яна бир фарқи эса, унинг 256 Гб хотирали тури ҳам мавжуд бўлиши мумкинлигида.
Изоҳ (0)