Buzzfeed нашри Малайзиянинг «Боинг»и қирувчи самолёт томонидан уриб туширилганига далил сифатида келтирилган сунъий йўлдошдан олинган сурат манбаси деб таништирилган Жорж Билт билан боғланди, деб ёзади «Медуза». Билтнинг айтишича, у суратни Россиянинг «Биринчи канали»да шу ҳақдаги кўрсатув чиққанидан сўнг блогерлар шу расмни топган форумдан олган.
Ўзини 26 йиллик стажга эга авиаэксперт ва МИТ битирувчиси сифатида таништирган америкалик ҳақиқатан ҳам Россия муҳандислар иттифоқи вице-президентига мактуб ёзиб, унга сунъий йўлдош суратини илова қилганини тасдиқлади, бироқ фотосуратнинг қаердан олинганига ҳам аниқлик киритганини айтди. Билтнинг ўзи расмнинг ҳақиқийлигини аниқ билмайди, аммо шахсий хати ОАВларда кенг тарқалиб кетганига афсус билдирди.
Эслатиб ўтамиз, Россия «Биринчи канали»нинг 14 ноябрь кунги эфирида Малайзия «Боинг»и гўё қирувчи самолёт томонидан уриб туширилгани тасвирланган сунъий йўлдош сурати намойиш этилди. Фотосурат «Однако» таҳлилий дастурида тақдим этилган. Дастурда ушбу сурат «уникал ва сенсацион» деб аталган.
«Медуза»нинг қайд этишича, ушбу сурат илк бор октябрь ойининг ўрталарида эълон қилинган, баъзи фойдаланувчилар эса унинг 2014 йил июлида пайдо бўлганини ҳам таъкидламоқда.
Изоҳ (0)