Avstraliyaliklar mamlakat bosh vaziri Toni Ebbott bayonotidan g‘azabga keldi, deya xabar bermoqda “RIA Novosti”. Gap shundaki, Ebbott 1788-yilda Britaniya mustamlakasiga aylanguniga qadar, Avstraliyada “butalardan boshqa hech narsa bo‘lmagani”ni aytdi.
“Bu salobatli shaharga qarab, uning qanchalik rivoj topganini ko‘rish mumkin. 1788-yilda bu yerda butalardan boshqa hech narsa bo‘lmaganini tasavvur qilish qiyin. Bu yerdan bir necha yuz yard nariga kelib tushgan askarlar va dengizchilar o‘zlarini Oyga kelib qolgandek his qilgan bo‘lsa ajab emas”, — dedi Ebbott.
Ebbott buni Sidneyda Buyuk Britaniya bosh vaziri Devid Kemeron bilan uchrashuv chog‘ida so‘zlagan nutqida aytib o‘tdi. Uning bayonotida Avstraliyaning tub aholisi va ularning mamlakatga qo‘shgan hissasi tilga olinmadi.
Ijtimoiy tarmoqlar foydalanuvchilari Ebbottning gapiga nisbatan g‘azabli izohlar bildirdi. “40 ming yillik tarix “butalardan boshqa hech narsa” degan ibora bilan o‘chirib tashlandi”, — deb yozadi Twitter foydalanuvchilaridan biri. “Oq tanli mustamlakachilar kelgunicha, yerlarimiz Yerdagi eng qadimiy madaniyatga boy edi”, — deyiladi yana bir izohda.
Izoh (0)