2014-yilning 14-oktabr kuni O‘zbekiston Respublikasi Tashqi ishlar vazirligida yurtimizga tashrif buyurgan Chernogoriya Respublikasi Prezidentining iqtisodiy masalalar bo‘yicha maslahatchisi Rujiya Tuzovich boshchiligidagi delegatsiya bilan uchrashuv bo‘lib o‘tdi. Bu haqda O‘zbekiston TIV matbuot xizmati xabar berdi.
Suhbat chog‘ida siyosiy, tijoriy-iqtisodiy, madaniy-gumanitar va boshqa jabhalardagi O‘zbekiston-Chernogoriya munosabatlari istiqbollari yuzasidan fikr almashildi.
Tomonlar ikki davlat o‘rtasidagi tovar aylanmasini oshirish uchun sezilarli salohiyatga ega ekanliklarini ta’kidlab o‘tdilar. O‘zbekiston va Chernogoriya ishbilarmon doiralari o‘rtasida to‘g‘ridan-to‘g‘ri aloqalarni o‘rnatish, qo‘shma sarmoyaviy loyihalarni ishlab chiqish va ularni amalga oshirish muhimligi ta’kidlandi.
Fan, ta’lim, sog‘liqni saqlash sohalarida ilmiy-tadqiqot markazlari va o‘quv yurtlari orasida aloqalar o‘rnatish yo‘li bilan amaliy hamkorlik qilish, sayyohlik yo‘nalishlarida tajriba almashish har ikki davlat manfaatlariga javob berishi qayd etildi.
Uchrashuvda turli darajadagi bo‘lajak ikki tomonlama uchrashuvlar bo‘yicha takliflar ham ko‘rib chiqildi.
Izoh (0)