2014-yilning 14-oktabr kuni O‘zbekiston Respublikasi delegatsiyasiga boshchilik qilayotgan Tashqi ishlar vaziri Abdulaziz Komilov Berlin shahrida Germaniya Federativ Respublikasining Federal tashqi ishlar vaziri Frank-Valter Shtaynmayer bilan uchrashdi. Bu haqda O‘zbekiston TIV matbuot xizmati xabar berdi.
Ikki davlat tashqi siyosat idoralari rahbarlari siyosiy, savdo-iqtisodiy, sarmoyaviy va boshqa sohalardagi davlatlararo aloqalarning istiqbollarini muhokama qildilar.
Barcha darajalardagi hamkorlikning o‘zaro ijobiy tajribasi, munosabatlarning muntazam yangilanayotgan shartnomaviy-huquqiy asosi ko‘p qirrali O‘zbekiston-Germaniya muloqoti kelajagiga ishonch bilan qarash imkonini yaratayotgani qayd etildi.
Uchrashuvda savdo-iqtisodiy, sarmoyaviy hamkorlikni yanada kengaytirish, yuksak nemis texnologiyasi va O‘zbekiston tomonidan xorijiy sarmoyadorlarga taqdim etiladigan katta imtiyozlardan foydalangan holda zamonaviy ishlab chiqarishni yo‘lga qo‘yishdan har ikki tomon ham manfaatdorligi ta’kidlab o‘tildi.
Suhbatdoshlar madaniy-gumanitar sohadagi aloqalarni kengaytirishning ustuvor yo‘nalishlariga alohida e’tibor qaratdilar.
Shuningdek, tomonlar dolzarb xalqaro va mintaqaviy muammolar, shu jumladan Afg‘onistonda vaziyatni tinch yo‘l bilan hal qilish masalalari yuzasidan fikr almashdilar.
Muzokaralar so‘ngida vazirlar O‘zbekiston Respublikasi va Germaniya Federativ Respublikasi o‘rtasida daromad va mol-mulk soliqlari yuzasidan ikki yoqlama soliqqa tortishning oldini olish to‘g‘risida 1999-yil 7-oktabrdagi Bitimga o‘zgartirish va qo‘shimchalar kiritish to‘g‘risida Bayonnomaga imzo chekdilar.
Shu kunning o‘zida Germaniya TIVning Sharqiy Yevropa, Kavkaz va Markaziy Osiyo bo‘yisha Vakili Kord Mayer-Klodt ishtirokida siyosiy maslahatlashuvlar ham bo‘lib o‘tdi.
Izoh (0)