Xalqaro valyuta fondi direktori: “Dunyo iqtisodiyotining bashorat qilinayotgan o‘sish darajasi pasaytirildi”

Xalqaro valyuta fondi (XVF) va Jahon bankining 10—12-oktabr kunlari Vashingtonda bo‘lib o‘tadigan an’anaviy uchrashuvi arafasida XVF boshqaruvchi direktori Kristin Lagard Jorjtaun universitetida nutq so‘zladi, deya xabar bermoqda Euronews.

O‘zining u qadar optimistik bo‘lmagan nutqida Lagard dunyo iqtisodiyotining bundan olti oy avval umid qilinganidan ancha zaif bo‘lib chiqqanini ta’kidladi. “Qayta tiklanish sodir bo‘lmoqda, biroq bu biz o‘ylagandan ko‘ra kuchsizroq. Biz 2015-yilda mo‘tadil o‘sishni prognoz qilmoqdamiz. Bashorat qilinayotgan o‘sish darajasi pasaytirildi”, — dedi u.

XVF direktorining ogohlantirishicha, ayrim davlatlar ishsizlik va davlat qarzini kamaytirish bo‘yicha qo‘shimcha chora-tadbirlarni amalga oshirmasa, sekin rivojlanish davri cho‘zilib ketishi mumkin.

“Rivojlangan iqtisodiyotlar ichida shubhasiz AQSh va Buyuk Britaniya yetakchilik qiladi. Ular yanada ko‘proq kuchlarini ishga solishi kerak. Qayta tiklanish Yaponiyada, ayniqsa yevrohududda juda zaif bormoqda, u yerdagi vaziyat turli mamlakatda turlichadir”, — dedi Kristin Lagard.