Ukraina harbiy hujumni rejalashtirmayapti. Bu haqda Ukraina tashqi ishlar vaziri Pavel Klimkin Germaniyaning Die Zeit gazetasiga bergan intervyusida ma’lum qildi, deb yozadi Segodnya.ua.

“Bizga birinchi navbatda mamlakatdagi ichki nizo uchun siyosiy yechim, shuningdek ushbu nizoga aloqador bo‘lgan Rossiya bilan shunga o‘xshash siyosiy yechim zarur”, — deya ta’kidladi u.

Vazir so‘zlariga ko‘ra, mamlakat sharqida Lugansk va Donetsk bilan vaqtinchalik sulh tuzish muammoning yechimi bo‘lib xizmat qilishi mumkin: ular alohida iqtisodiy maqomga ega bo‘lishi, biroq Ukrainaning bir qismi bo‘lib qolishi mumkin. “Rossiya namunasidagi federalizatsiyani nomaqbul deb hisoblaymiz”, — dedi u.

Shu bilan birga, Ukraina tashqi siyosiy idorasi rahbari Ukraina NATO bilan hamkorlik qilayotgani, biroq hujum bo‘yicha hech qanday rejalari yo‘qligini aytib o‘tdi.

Bundan tashqari, vazir Yevropa davlatlari bilan qurol-yarog‘ yetkazib berish haqidagi ba’zi muzokaralar muvaffaqiyatli o‘tganini tan oldi. “Biroq bunda gap hujumkor emas, mudofaa qurollari haqida bormoqda. Ular bizga juda zarur, — dedi Klimkin. — Masalan, NATOning so‘nggi sammiti oldidan Germaniya bilan o‘tkazilgan muzokaralar haqiqiy omad keltirdi. Germaniya bizga qurol-yarog‘ yetkazib berishga rozi bo‘ldi”.