Boshi teskari holatda tug‘ilgan braziliyalik hayotda o‘z o‘rnini topmoqda

37 yoshli braziliyalik Klaudio Viyeyra de Oliver tug‘ilganida unga artrogripoz tashxisi qo‘yilgan edi. Bu kasallik suyak va to‘qimalarning noto‘g‘ri rivojlanishi bilan izohlanadi. Klaudio Viyeyra de Oliverda esa kasallikning eng og‘ir ko‘rinishi kuzatilgan. Bu haqda 1news.az’ga tayanib, “Kun” xabar bermoqda.

Shifokorlar uning onasi Mariyaga go‘dak uzoq yashamasligini darhol aytishgan. Ammo bugunga kelib Klaudio nafaqat yashab ketdi, balki maktabni va Feyra-di-Santana davlat universitetining buxgalteriya yo‘nalishini muvaffaqiyat bilan tugatdi.

Klaudioning oyoq-qo‘li kuchli deformatsiyaga uchragan. Boshi esa katta gradusda orqaga qayrilgan. Shuning uchun uning qo‘llari deyarli ishlamaydi. Klaudio yozuv-chizuvlarni qalamni og‘zida tutib turgan holda amalga oshiradi.

Shuningdek, u kompyuter va telefondan ham unumli foydalanadi. Klaudio shahar bo‘ylab mustaqil harakatlanishi uchun oyoqlariga maxsus moslama yasashgan.

– Biz unga nisbatan hech qachon nogironday muomala qilmadik, – deydi Klaudioning oilasi. – Nimadir qilishni xohlasa, mustaqil bajarishi uchun imkon berdik. Uning kasalligi shu darajadaki, hatto u nogironlar aravachasidan ham foydalana olmaydi. Qiyin bo‘lsa ham o‘zi harakatlanadi. Aynan shuning uchun ham hozir uning ishonchi o‘ziga baland. U ko‘chada o‘zi yura oladi, kuylash va hatto raqsga tushishni ham uddalaydi.