Donbassdagi aksilterrorchilik operatsiyalari yakunlandi, endi asosiy vazifa — Ukrainaga bostirib kirgan Rossiya Federatsiyasiga qarshi mudofaani saflashdir. Bu haqda Ukraina mudofaa vaziri Valeriy Geletey o‘zining Facebook’dagi sahifasida ma’lum qildi.
“Ukraina Sharqini ozod qilish bo‘yicha operatsiya tugadi. Endi zudlik bilan nafaqat avval terrorchilar tomonidan egallab olingan hududlarda mustahkam o‘rnashib olishga, balki Ukrainaning boshqa hududlariga hujum qilishga ham urinayotgan Rossiyaga qarshi mudofaa tashkil qilishimiz kerak. Bizning uyimizga Yevropa Ikkinchi jahon urushidan buyon ko‘rmagan katta urush keldi”, — deb yozadi u.
Harbiy idora rahbarining so‘zlariga ko‘ra, “bunday urushda qurbonlar soni yuzlab emas, minglab, hattoki o‘n minglab bo‘ladi”. “Bugungi kunda biz diviziya va polklar bilan ish ko‘rmoqdamiz. Ertaga korpuslarga duch kelishimiz mumkin”, — deya qayd etdi vazir.
“Norasmiy kanallar orqali Rossiya ogohlantirish berib, qarama-qarshilik davom etaversa, bizga qarshi taktik yadro quroli qo‘llash bilan tahdid qilgan”, — deya qo‘shimcha qildi Geletey.
Shu bilan birga, mudofaa vaziri bunday urushda g‘olib chiqish uchun barcha kuchlar to‘liq to‘planishi zarurligi, shu tufayli kuch bloki rahbarlarini iste’foga chiqarish haqida hozir gap ham bo‘lishi mumkin emasligini aytib o‘tdi.
“Segodnya” nashrining eslatishicha, Ukraina prezidenti Pyotr Poroshenko 25—31-avgust kunlari aksilterrorchilik operatsiyalari zonasidagi hodisalar tahlil qilinib, kadrlar bilan bog‘liq qarorlar qabul qilinishini ta’kidlagan edi.
“Vaziyat so‘nggi kunlarda yanada keskinlashib ketdi. Ukrainaga qarshi qo‘shni davlatdan endi to‘g‘ridan-to‘g‘ri va ochiq tajovuz boshlandi. Bu jangovar harakatlar hududidagi muhitni butunlay o‘zgartirib, kuch tuzilmalarimiz oldiga yangi va ancha murakkab masalalarni qo‘yadi”, — degan edi u Bogun nomidagi harbiy litseydagi tadbirda.
Izoh (0)