Liviya poytaxtidagi AQSh elchixonasi radikal guruhlar tomonidan egallab olindi, deya xabar bermoqda “ITAR-TASS” “Al-Arabiya” telekanaliga tayanib.
Diplomatik vakolatxonadagi jangarilar qo‘mondonlaridan birining aytishicha, ular bundan bir hafta avval, iyul oxirida muassasaning amerikalik xodimlari qo‘shni Tunisga evakuatsiya chog‘ida uni tark etganidan bir oy o‘tib, majmuani qo‘lga olgan.
Tripolida aqidaparastlarga qarshi urush e’lon qilgan quvg‘indagi general Xaftar qo‘llab-quvvatlayotgan “Zintan” guruhi va aqidaparast guruhlar o‘rtasida xalqaro aeroport uchun janglar ekstremistlar foydasiga hal bo‘lgach, obyekt egallab olingan.
Internetga joylangan videoyozuv guvohlik berishicha, aqidaparastlar AQSh diplomatik missiyasi hududidagi turar joy qismida xo‘jayinlik qilmoqda. O‘nlab yosh yigitlar u yerda qurol bilan sayr qilib yuribdi.
28-iyul kuni Liviyadagi AQSh diplomatik missiyasi Tunisga evakuatsiya qilingani haqida xabar berilgan edi. AQSh davlat departamenti rahbari Jon Kerri elchixona yaqinida sodir bo‘layotgan zo‘ravonlikdan xavfsirayotganliklarini bildirgan edi. “Vaziyat bizning xodimlarimizga xavf solmoqda. Shu tufayli Liviyadagi elchixonamiz faoliyatini vaqtinchalik to‘xtatishga qaror qildik”, — degan edi u.
Izoh (0)