Боши тескари ҳолатда туғилган бразилиялик ҳаётда ўз ўрнини топмоқда

37 ёшли бразилиялик Клаудио Виейра де Оливер туғилганида унга артрогрипоз ташхиси қўйилган эди. Бу касаллик суяк ва тўқималарнинг нотўғри ривожланиши билан изоҳланади. Клаудио Виейра де Оливерда эса касалликнинг энг оғир кўриниши кузатилган. Бу ҳақда 1news.az’га таяниб, «Кун» хабар бермоқда.

Шифокорлар унинг онаси Марияга гўдак узоқ яшамаслигини дарҳол айтишган. Аммо бугунга келиб Клаудио нафақат яшаб кетди, балки мактабни ва Фейра-ди-Сантана давлат университетининг бухгалтерия йўналишини муваффақият билан тугатди.

Клаудионинг оёқ-қўли кучли деформацияга учраган. Боши эса катта градусда орқага қайрилган. Шунинг учун унинг қўллари деярли ишламайди. Клаудио ёзув-чизувларни қаламни оғзида тутиб турган ҳолда амалга оширади.

Шунингдек, у компьютер ва телефондан ҳам унумли фойдаланади. Клаудио шаҳар бўйлаб мустақил ҳаракатланиши учун оёқларига махсус мослама ясашган.

– Биз унга нисбатан ҳеч қачон ногирондай муомала қилмадик, – дейди Клаудионинг оиласи. – Нимадир қилишни хоҳласа, мустақил бажариши учун имкон бердик. Унинг касаллиги шу даражадаки, ҳатто у ногиронлар аравачасидан ҳам фойдалана олмайди. Қийин бўлса ҳам ўзи ҳаракатланади. Айнан шунинг учун ҳам ҳозир унинг ишончи ўзига баланд. У кўчада ўзи юра олади, куйлаш ва ҳатто рақсга тушишни ҳам уддалайди.