Eron prezidenti Hasan Ruhoniy mamlakat diniy arboblariga murojaat qilib, internet va boshqa raqamli texnologiyalarga bag‘rikenglik bilan munosabatda bo‘lishga chaqirdi, deya xabar bermoqda BBC.
Siyosatchi so‘zlariga ko‘ra, butunjahon tarmog‘i olimlar uchun o‘ta muhimdir, shuningdek yoshlar uchun foydalidir.
O‘zining o‘tgan yilgi saylovoldi kampaniyalaridayoq Ruhoniy OAVdagi senzurani zaiflashtirishga va’da bergan, bu esa konservativ imomlar tanqidiga sabab bo‘lgan edi.
Shu bilan birga, ikki hafta avval Eronda fan, tadqiqotlar va texnologiyalar vaziri “G‘arb qarshisida bosh egish”da ayblanib, o‘z lavozimidan chetlatilgan edi.
O‘tgan hafta yuqori lavozimdagi diniy xodim oyatulloh Mukarram Sheroziy mobil aloqa va internetni “axloqsiz va noqonuniy” deb atagan edi.
Eronning konservativ qarashlarga ega diniy arboblari mamlakatda keng polosali mobil internet joriy etilishiga qarshi chiqib, buni “axloq tamoyillariga zid bo‘lgan ma’lumotlarni yanada tez va oson qabul qilishga yo‘l ochilishi” bilan izohladi.
Tahlilchilar fikricha, prezident Ruhoniy so‘zlari Iroqda keng omma noroziligiga uchraydi, biroq uning amaliy oqibatlarga olib kelish-kelmasligi hozircha noma’lum.
2009-yilda Eron rahbariyatiga qarshi norozilik avj olib ketgach, hukumat matbuot erkinligi va internetga ulanishni keskin chekladi. Facebook, Twitter, Youtube va boshqa saytlar mamlakatda taqiqlandi.
Bir necha hafta avval Eron hukumati uchta kompaniyaga 3G keng polosali mobil internet taqdim etish uchun litsenziya berdi. Biroq ekspertlar so‘zlariga ko‘ra, eronliklarning juda kam qismigina ayni paytda bu xizmatdan foydalanadi.
Izoh (0)