Turkiyadagi eng yirik shahar — Istanbulda mahalliy politsiyachilardan biri ortidagi kishi ko‘prikdan sakramoqchi bo‘lib turgan vaqtda selfi olib, qo‘lga tushdi. Shafqatsiz va o‘ziga bino qo‘ygan tartib posbonini jinoiy ish kutmoqda, deya xabar berdi Hurriyet Daily News.
Fojia Istanbuldagi Bosfor ko‘prigida sodir bo‘ldi. Ismi oshkor qilinmayotgan kishi o‘z joniga qasd qilmoqchi bo‘ldi. Voqea joyiga tartib posbonlari yetib kelib, uch soat davomida fuqaroni ko‘prikdan sakramaslikka ko‘ndirishga urindi. Hamkasblari odam hayotini saqlab qolishga harakat qilayotgan bir vaqtda tezkor xizmat xodimlaridan biri o‘z-o‘zini suratga tushirib, ko‘ngilxushlik qildi.
Afsuski, tartib posbonlari erkakni o‘z hayotini saqlab qolishga ko‘ndira olmadi. Shuncha tushuntirishlarga qaramay, u baribir 64 metr balandlikdan sakradi. Turkiya fuqarosining jasadi qirg‘oq qo‘riqchilari tomonidan topildi.
Istanbul politsiyachisining shov-shuvli selfisi ijtimoiy tarmoqlar bo‘ylab shiddat bilan tarqalib ketdi. Ayni paytda hukumat beadab politsiya xodimiga nisbatan jinoiy ish qo‘zg‘agan.
Izoh (0)