Misr sobiq prezidenti Husni Muborakka nisbatan 2011-yildagi inqilobiy voqealar chog‘ida namoyishchilar o‘limi bilan bog‘liq sud ishi yuzasidan hukm 27-sentabrda e’lon qilinadi. Bu haqda “ITAR-TASS” xabar berdi.
Yuzlab jilddan iborat jinoiy ish hujjatlarini sudyalar deyarli bir yarim yildan buyon o‘rganib chiqmoqda. 13-avgust, chorshanba kuni bosh ayblanuvchi ilk bora advokat yordamisiz o‘z himoyasi uchun nutq so‘zladi va namoyishchilarga qarata o‘t ochishni buyurmaganini aytdi. “Aksincha, odamlarga zarar yetmasligi uchun qo‘limdan kelganini qilishga urindim”, — dedi u. Qon to‘kilishi oldini olish uchun, o‘ziga qarata aytilayotgan haqoratlarga qaramasdan iste’fo berish qaroriga kelganini ta’kidladi.
2011-yil yanvar—fevralidagi ommaviy aksilhukumat namoyishlarida yuzlab kishilar o‘limi bo‘yicha jinoiy ish o‘sha yilning yozidayoq ochilgan, biroq ayblanuvchilarga qarshi dalillarning yetarli bo‘lmagani sababli Husni Muborak, uning ikki o‘g‘li, sobiq ichki ishlar vaziri va boshqalarga hukm chiqarilmagan.
2012-yil iyunida Muborak baribir bir umrlik qamoq jazosiga hukm qilindi, biroq tomonlardan hech birini qoniqtirmagan sud hukmi ustidan kuzda shikoyat arizasi tushdi. Natijada 2013-yil aprelida sud protsessi nuldan qayta boshlandi.
Izoh (0)