Миср собиқ президенти Ҳусни Муборакка нисбатан 2011 йилдаги инқилобий воқеалар чоғида намойишчилар ўлими билан боғлиқ суд иши юзасидан ҳукм 27 сентябрда эълон қилинади. Бу ҳақда ИТАР-ТАСС хабар берди.
Юзлаб жилддан иборат жиноий иш ҳужжатларини судьялар деярли бир ярим йилдан буён ўрганиб чиқмоқда. 13 август, чоршанба куни бош айбланувчи илк бора адвокат ёрдамисиз ўз ҳимояси учун нутқ сўзлади ва намойишчиларга қарата ўт очишни буюрмаганини айтди. «Аксинча, одамларга зарар етмаслиги учун қўлимдан келганини қилишга уриндим», — деди у. Қон тўкилиши олдини олиш учун, ўзига қарата айтилаётган ҳақоратларга қарамасдан истеъфо бериш қарорига келганини таъкидлади.
2011 йил январь—февралидаги оммавий аксилҳукумат намойишларида юзлаб кишилар ўлими бўйича жиноий иш ўша йилнинг ёзидаёқ очилган, бироқ айбланувчиларга қарши далилларнинг етарли бўлмагани сабабли Ҳусни Муборак, унинг икки ўғли, собиқ ички ишлар вазири ва бошқаларга ҳукм чиқарилмаган.
2012 йил июнида Муборак барибир бир умрлик қамоқ жазосига ҳукм қилинди, бироқ томонлардан ҳеч бирини қониқтирмаган суд ҳукми устидан кузда шикоят аризаси тушди. Натижада 2013 йил апрелида суд процесси нулдан қайта бошланди.
Изоҳ (0)