Hindistonning Bixar shtati san’at, madaniyat va yoshlar ishlari bo‘yicha vaziri mobil telefonlardan foydalanish va vegetarianlarga xos bo‘lmagan taomlarni iste’mol qilishni ayollar va qizlarga qilinayotgan hujumning sababi deb ko‘rsatdi. Bu haqda Buyuk Britaniyaning Independent gazetasiga tayanib, “RIA Novosti” xabar berdi.
Vazirning aytishicha, ko‘pchilik o‘quvchilar mobil telefonlardan ochiq lavhali film va suratlar ko‘rish, bir-biri bilan almashish, ongni zaharlaydigan qo‘shiqlar tinglash uchun foydalanadi. U shu kabi bir qancha zararli illatlarni yodga olib, maktablarda telefon ishlatishni taqiqlash taklifi bilan chiqdi.
Shuningdek, vazirning aytishicha, novegetarian taomlarning iste’mol qilinishi mamlakatda zo‘ravonlikning kuchayishiga, yoshlarning qahri qattiq bo‘lib qolishiga sabab bo‘lgan. U o‘z nutqida vegetarianlik taomlari tana va ruhni tozalashini ta’kidladi.
Avvalroq Chxattisgarx shtati ichki ishlar vaziri nomusga tegish holatlariga avvaldan rejalashtirilmagan, to‘satdan yuz beruvchi holat deb baho bergan bo‘lsa, Madxya-Pradesh shtati ichki ishlar vaziri nomusga tegishni “ayrim vaqtda o‘rinli” ekanini aytgan. Uttar-Pradesh mintaqaviy siyosiy partiya yetakchisi esa guruh bilan nomusga teguvchi kishilarga belgilanadigan o‘lim jazosiga qarshi chiqib, “bolalar xato qilib turishi”ni aytgan.
Ma’lumotlarga ko‘ra, Hindistonda nomusga tegish jinoyati o‘rtacha har 27 daqiqada sodir bo‘ladi, biroq ko‘p hollarda bu haqda politsiyaga xabar berilmaydi yoki ularga nisbatan tegishli chora ko‘rilmaydi.
Izoh (0)