16-iyul, chorshanba kuni Rossiya poytaxtida Moskva metropolitenidagi halokat qurbonlari xotirasiga motam e’lon qilindi, deya xabar berdi “RIA Novosti”.

Moskva metrosidagi halokat joyida qutqaruv va tergov ishlari seshanba kuni kechqurunga borib tugadi. Qayta tiklash ishlariga mutaxassislar tomonidan 30 soat ajratildi.

So‘nggi ma’lumotlarga ko‘ra, halok bo‘lganlar soni 22 tani tashkil qildi. 129 kishi shifoxonalarga yetkazilgan, ularning 42 nafari og‘ir ahvolda, deya aytilmoqda.

Ijtimoiy siyosat bo‘yicha bosh vazir o‘rinbosari Olga Golodets so‘zlariga ko‘ra, halok bo‘lganlar ichida Xitoy va Tojikiston fuqarolari ham bor. Jabrlanganlarni esa Rossiya fuqarolaridan tashqari, Ukraina, Moldaviya, Tojikiston, O‘zbekiston va Qirg‘iziston fuqarolari tashkil etdi.

Eslatib o‘tamiz, 15-iyul kuni Moskvaning “Slavyan sayilgohi” (“Slavyanskiy bulvar”) — “G‘alaba bog‘i” (“Park Pobedi”) metro yo‘nalishida signalizatsiya tizimining ishlab ketishi natijasida harakatlanayotgan poyezd keskin to‘xtab, vagonlari relsdan chiqib ketdi. Taxminlarga ko‘ra, ushbu hodisaga kuchlanishning sakrashi sabab bo‘lgan.