Ҳиндистоннинг Бихар штати санъат, маданият ва ёшлар ишлари бўйича вазири мобил телефонлардан фойдаланиш ва вегетарианларга хос бўлмаган таомларни истеъмол қилишни аёллар ва қизларга қилинаётган ҳужумнинг сабаби деб кўрсатди. Бу ҳақда Буюк Британиянинг Independent газетасига таяниб, «РИА Новости» хабар берди.
Вазирнинг айтишича, кўпчилик ўқувчилар мобил телефонлардан очиқ лавҳали фильм ва суратлар кўриш, бир-бири билан алмашиш, онгни заҳарлайдиган қўшиқлар тинглаш учун фойдаланади. У шу каби бир қанча зарарли иллатларни ёдга олиб, мактабларда телефон ишлатишни тақиқлаш таклифи билан чиқди.
Шунингдек, вазирнинг айтишича, новегетариан таомларнинг истеъмол қилиниши мамлакатда зўравонликнинг кучайишига, ёшларнинг қаҳри қаттиқ бўлиб қолишига сабаб бўлган. У ўз нутқида вегетарианлик таомлари тана ва руҳни тозалашини таъкидлади.
Аввалроқ Чхаттисгарх штати ички ишлар вазири номусга тегиш ҳолатларига аввалдан режалаштирилмаган, тўсатдан юз берувчи ҳолат деб баҳо берган бўлса, Мадхя-Прадеш штати ички ишлар вазири номусга тегишни «айрим вақтда ўринли» эканини айтган. Уттар-Прадеш минтақавий сиёсий партия етакчиси эса гуруҳ билан номусга тегувчи кишиларга белгиланадиган ўлим жазосига қарши чиқиб, «болалар хато қилиб туриши»ни айтган.
Маълумотларга кўра, Ҳиндистонда номусга тегиш жинояти ўртача ҳар 27 дақиқада содир бўлади, бироқ кўп ҳолларда бу ҳақда полицияга хабар берилмайди ёки уларга нисбатан тегишли чора кўрилмайди.
Изоҳ (0)