Tojikistonlik chegarachilar Qirg‘izistonning “Tamdik” chegara postini minomyot va granatomyotlar bilan o‘qqa tutdi. Bu haqda Qirg‘iziston davlat chegara xizmati matbuot kotibi Gulmira Borubayeva bergan ma’lumotga asoslanib, “RIA Novosti” xabar qildi.
10-iyul, payshanba kuni Qirg‘iziston chegarachilari davlat chegarasidagi talash hududda vodoprovod qurishni to‘xtatishni talab qilgach, Tojikiston fuqarolari ularga tosh yog‘dira boshlagan. Natijada voqea joyiga yetib kelgan har ikkala davlat chegarachilari o‘rtasida otishma boshlangan. Qirg‘iz harbiy xizmatchilari hech kim jabrlanmaganini ma’lum qilgan bo‘lsa, tojik OAVlari bir qurbon va yana bir necha yarador haqida xabar bergan.
Qurolli hodisa tufayli qirg‘iz-tojik davlat chegarasi hududidagi Qirg‘iziston davlat chegara xizmati bo‘linmalari xizmat o‘tashning kuchaytirilgan rejimiga o‘tkazilgan. Ayni paytda otishmalar to‘xtagan. Voqea joyidagi vaziyatga oydinlik kiritish uchun har ikkala tomon chegara vakillari tashrif buyurgan.
Izoh (0)