Pxenyan BMTga Kim Chen Inga suiqasd uyushtirilishi haqidagi Gollivud filmi ustidan shikoyat qildi

KXDR BMTga Shimoliy Koreya yetakchisi Kim Chen Inga nisbatan suiqasd uyushtirilgani haqidagi Gollivud komediyasiga qarshi norozilik maktubi yo‘lladi. Bundan tashqari, Vashingtonni filmni namoyish qilishni taqiqlashga chaqirdi. Bu haqda Singapurning Strait Times gazetasi xabar berdi, deb yozadi Interfax.

BMT bosh kotibi Pan Gi Mun nomiga jo‘natilgan maktubda filmni omma e’tiboriga havola etish “terrorizmga ochiqdan-ochiq homiylik qilish”ga tenglashtirilgan.

Avvalroq Shimoliy Koreya tashqi ishlar vazirligi ushbu film “ganster rejissorlar” ijod mahsuli ekanini va jamoatchilikka taqdim etilmasligi kerakligini aytgan edi.

Eslatib o‘tamiz, “Intervyu” deb nomlangan ushbu film syujetida AQSh televideniyesida ishlaydigan ikki muxbir Kim Chen Indan intervyu olish imkoniga ega bo‘ladi. Ular Shimoliy Koreyaga ketish safaridan avval maxfiy xizmat tomonidan KXDR rahbarini o‘ldirish haqida buyruq oladi.

Ma’lumotlarga ko‘ra, film joriy yilning oktabr oyida omma e’tiboriga taqdim etiladi. Filmdagi bosh rollarda Jeyms Franko (“O‘rgimchak odam”) va Set Rogen ishtirok etgan.

Avvalroq KXDR amaldorlari ushbu filmni tanqid qilib, agar film Amerika ekranlarida ko‘rsatiladigan bo‘lsa, ular AQShning barcha kinoteatrlarni yo‘q qilish bilan tahdid qilgan edi.