Пхеньян БМТга Ким Чен Инга суиқасд уюштирилиши ҳақидаги Голливуд фильми устидан шикоят қилди

КХДР БМТга Шимолий Корея етакчиси Ким Чен Инга нисбатан суиқасд уюштирилгани ҳақидаги Голливуд комедиясига қарши норозилик мактуби йўллади. Бундан ташқари, Вашингтонни фильмни намойиш қилишни тақиқлашга чақирди. Бу ҳақда Сингапурнинг Strait Times газетаси хабар берди, деб ёзади Interfax.

БМТ бош котиби Пан Ги Мун номига жўнатилган мактубда фильмни омма эътиборига ҳавола этиш «терроризмга очиқдан-очиқ ҳомийлик қилиш»га тенглаштирилган.

Аввалроқ Шимолий Корея ташқи ишлар вазирлиги ушбу фильм «ганстер режиссёрлар» ижод маҳсули эканини ва жамоатчиликка тақдим этилмаслиги кераклигини айтган эди.

Эслатиб ўтамиз, «Интервью» деб номланган ушбу фильм сюжетида АҚШ телевидениесида ишлайдиган икки мухбир Ким Чен Индан интервью олиш имконига эга бўлади. Улар Шимолий Кореяга кетиш сафаридан аввал махфий хизмат томонидан КХДР раҳбарини ўлдириш ҳақида буйруқ олади.

Маълумотларга кўра, фильм жорий йилнинг октябрь ойида омма эътиборига тақдим этилади. Фильмдаги бош ролларда Жеймс Франко («Ўргимчак одам») ва Сет Роген иштирок этган.

Аввалроқ КХДР амалдорлари ушбу фильмни танқид қилиб, агар фильм Америка экранларида кўрсатиладиган бўлса, улар АҚШнинг барча кинотеатрларни йўқ қилиш билан таҳдид қилган эди.