Xakerlar Isroil armiyasi rasmiy Twitter’iga radiatsiya xavfi haqida yolg‘on xabar joylashtirdi

Isroil armiyasi matbuot xizmati o‘zining Twitter tizimidagi inglizcha mikroblogiga xakerlar tomonidan hujum uyushtirilganini xabar qildi va ular joylagan noto‘g‘ri ma’lumotlar uchun uzr so‘radi. Bu haqda “RIA Novosti” xabar berdi.

Xakerlar armiya Twitter’iga Isroildagi Dimona shahrida yadro markaziga raketa kelib tushgani va radiatsiya chiqishi xavfi borligi haqidagi xabarni joylab qo‘ygan edi.

“Biz haqiqatga to‘g‘ri kelmaydigan xabarlar uchun uzr so‘raymiz. Bizning Twitter-akkauntimizga buzib kirishdi. Biz barcha frontlarda, shu jumladan kiber-makonda ham terrorga qarshi kurashamiz”, — deb yozdi Isroil Mudofaa armiyasi matbuot xizmati mikroblog ustidan nazoratni qaytarib olgach.

Ushbu xakerlik harakatini “Suriya elektron armiyasi” guruhi a’zolari o‘z bo‘yniga olishdi, bu bilan ular falastinliklar bilan hamjihat ekanini ko‘rsatmoqchi bo‘lgan. Avvalroq Suriya prezidenti Bashar Asadni qo‘llab-quvvatlovchi ushbu guruh yirik G‘arb OAVlari, hattoki AQSh dengiz piyodalari korpuslari saytlari va akkauntlariga hujum qilgan.