Исроил армияси матбуот хизмати ўзининг Twitter тизимидаги инглизча микроблогига хакерлар томонидан ҳужум уюштирилганини хабар қилди ва улар жойлаган нотўғри маълумотлар учун узр сўради. Бу ҳақда «РИА Новости» хабар берди.
Хакерлар армия Twitter’ига Исроилдаги Димона шаҳрида ядро марказига ракета келиб тушгани ва радиация чиқиши хавфи борлиги ҳақидаги хабарни жойлаб қўйган эди.
«Биз ҳақиқатга тўғри келмайдиган хабарлар учун узр сўраймиз. Бизнинг Twitter-аккаунтимизга бузиб киришди. Биз барча фронтларда, шу жумладан кибер-маконда ҳам террорга қарши курашамиз», — деб ёзди Исроил Мудофаа армияси матбуот хизмати микроблог устидан назоратни қайтариб олгач.
Ушбу хакерлик ҳаракатини «Сурия электрон армияси» гуруҳи аъзолари ўз бўйнига олишди, бу билан улар фаластинликлар билан ҳамжиҳат эканини кўрсатмоқчи бўлган. Аввалроқ Сурия президенти Башар Асадни қўллаб-қувватловчи ушбу гуруҳ йирик Ғарб ОАВлари, ҳаттоки АҚШ денгиз пиёдалари корпуслари сайтлари ва аккаунтларига ҳужум қилган.
Изоҳ (0)