AQSh prezidenti Barak Obama rasmiy qabullardan birida Oq uy oshpazi taomlarga og‘ir narkotiklar qo‘shishi haqida hazillashdi. Bu haqda Breitbart xabar berdi.
OAV vakillari oldida Obama oshpazning shirinliklari, ayniqsa, piroglari juda mazali bo‘lishini, ba’zan ularga narkotik qo‘shilgandek tuyulishini aytdi. “Ularni qanday bunchalik mazali qilib tayyorlaydi, hayronman… Balki ularga krek qo‘shar”, — deya hazillashdi prezident.
Prezidentning hazili mehmonlarda kulgi uyg‘otdi, biroq nutq chog‘ida hozir bo‘lgan Mishel Obama uning shirinliklarda narkotik borligi haqidagi taxminini hajviy yo‘l bilan rad etib: “Yo‘q, u bunday qilmaydi! Bizning pishiriqlarimizda krek yo‘q”, — deya vaziyatni o‘ngladi.
Davlat rahbarining hazili internet-foydalanuvchilar orasida turli fikrlarni keltirib chiqardi. Ko‘pchilik uni noo‘rin deb topdi. Shuningdek, foydalanuvchilar Barak Obama avvalroq yoshligida yengil narkotiklar qabul qilgani haqida gapirib berganini esladi.
Izoh (0)