Rossiyaning “RIA Novosti” nashri AQSh olimlari “selfi” tushirishga ishqibozlikni rasman ruhiy kasallik deb tan olgani haqida xabar tarqatgan edi. U bundan uch oy avval paydo bo‘lgan soxta yangilikka asoslanib yozilgani ma’lum bo‘ldi. Bu haqda TJournal xabar berdi.
“RIA Novosti” xabarida manbaga link berilmagan. Biroq TJournal’ning aniqlashicha, xabar matni The Adobo Chronicles uydirma yangiliklar portalida mart oxirida paydo bo‘lgan maqolaning so‘zma-so‘z tarjimasidir.
The Adobo Chronicles hajviy, istehzoli va soxta xabarlar nashr qilishga “ixtisoslashgan”. Portal yaratuvchilarining ogohlantirishicha, sayt materiallari “fakt va uydirmalar aralashmasi bo‘lib, fantaziya bilan bezatilgan”.
Manba tomonidan e’lon qilingan “selfi”-kasallik haqidagi uydirma xabar aprel boshida ko‘pgina G‘arb OAVlari tomonidan berilgan edi, biroq ular yangilikning soxta ekaniga tushunib, hazil tariqasida undan foydalana olishgan edi.
Eslatib o‘tamiz, “RIA Novosti” xabarida aytilishicha, Amerika psixiatriya assotsiatsiyasi olimlari selfies deb atalgan yangi kasallik klassifikatsiyasi taqdimotini Chikagoda o‘tkazdi.
Psixiatrlarning fikricha, selfies obsessiv-kompulsiv kasallik bo‘lib, o‘ziga bo‘lgan hurmat o‘rnini to‘ldirish uchun doimiy ravishda o‘zini suratga tushirib, suratlarni ijtimoiy tarmoqlarga joylash istagi bilan tavsiflanadi.
Kasallik uch darajada bo‘lib, birinchisida kishi bir kunda o‘zini kamida uch marta “selfi”ga tushiradi, biroq ijtimoiy tarmoqlarga joylamaydi.
Ikkinchi — o‘tkir darajada odam o‘zini bir kunda kamida uch martda suratga olib, ijtimoiy tarmoqlarga qo‘yadi.
Uchinchi — surunkali kasallikda esa foydalanuvchi o‘zini tun-kun “selfi”ga olib, bir kunda olti martalab internetga joylaydi.
Izoh (0)