Барак Обама Оқ уй ошпази ширинликларга наркотик қўшиши ҳақида ҳазил қилди

АҚШ президенти Барак Обама расмий қабуллардан бирида Оқ уй ошпази таомларга оғир наркотиклар қўшиши ҳақида ҳазиллашди. Бу ҳақда Breitbart хабар берди.

ОАВ вакиллари олдида Обама ошпазнинг ширинликлари, айниқса, пироглари жуда мазали бўлишини, баъзан уларга наркотик қўшилгандек туюлишини айтди. «Уларни қандай бунчалик мазали қилиб тайёрлайди, ҳайронман… Балки уларга крек қўшар», — дея ҳазиллашди президент.

Президентнинг ҳазили меҳмонларда кулги уйғотди, бироқ нутқ чоғида ҳозир бўлган Мишель Обама унинг ширинликларда наркотик борлиги ҳақидаги тахминини ҳажвий йўл билан рад этиб: «Йўқ, у бундай қилмайди! Бизнинг пишириқларимизда крек йўқ», — дея вазиятни ўнглади.

Давлат раҳбарининг ҳазили интернет-фойдаланувчилар орасида турли фикрларни келтириб чиқарди. Кўпчилик уни ноўрин деб топди. Шунингдек, фойдаланувчилар Барак Обама аввалроқ ёшлигида енгил наркотиклар қабул қилгани ҳақида гапириб берганини эслади.