Oq uy Yevropadagi ittifoqdoshlar xavfsizligini mustahkamlash uchun kongressdan 1 mlrd dollar so‘radi

AQSh ma’muriyati NATO bo‘yicha o‘z ittifoqdoshlari mudofaasi uchun kongressga 1 milliard dollar so‘rab murojaat qildi. Bu haqda Oq uy tarqatgan ma’lumotga tayanib, “ITAR-TASS” xabar berdi.

Ma’muriyat 2015-moliya yili uchun xorijdagi maxsus operatsiyalarga tegishli byudjet so‘rovi doirasida bunday murojaat bilan chiqdi. Uning umumiy qiymati 65,8 milliard dollarga baholanmoqda.

Ushbu so‘rov bo‘yicha “Yevropa dasturi” “AQShning NATO bo‘yicha ittifoqdoshlari va Yevropadagi sherik davlatlar xavfsizligi va imkoniyatlarini mustahkamlashda vaqtinchalik yordam” ko‘rsatishga qaratilgan.

Ko‘rsatilgan mablag‘ning 925 million dollari mudofaa vazirligiga, 75 million dollari esa AQSh davlat departamentiga yo‘naltiriladi.

Oq uydagilar ta’kidlashicha, ushbu mablag‘larni “AQShning Yevropadagi, ayniqsa markaziy va sharqiy Yevropadagi harbiy ishtirokini kengaytirish”ga sarflash rejalashtirilgan.