JCh — 2014 guruh bosqichi so‘nggi 3-turidan o‘rin olgan Gollandiya – Chili uchrashuvi o‘z nihoyasiga yetdi va unda “Uchar gollandlar” 2:0 hisobidagi g‘alabani qo‘lga kiritishdi. Bu haqda Uff.uz xabar berdi.
Bu g‘alaba Lui Van Gal shogirdlariga “B” guruhidagi birinchi o‘rinni taqdim etdi.
Uchrashuv birinchi bo‘limi ancha zerikarli o‘tdi. Ikki jamoa ham kelasi bosqichga chiqqan, bu uchrashuv aynan kim birinchi o‘rindan pley-off bosqichiga chiqadi degan savolga javob topib berishi kerak edi.
Chili terma jamoasi Braziliyaga to‘qnash kelish xavfi bor ekanligini bilib oldinga intildi, biroq gollandlar yaxshi himoyalanishdi va birinchi bo‘limda raqiblariga imkoniyat qoldirishmadi.
Ikkinchi bo‘limdan boshlab Gollandiyaning qarshi hujumlari rang-barang ko‘rinish oldi. Maydonga tezkor Depay va markaziy yarim himoyachi Fer tushirildi. 77-daqiqaga kelib burchak to‘pidan so‘ng Van Gal shogirdlari to‘pni jarima maydoniga tashlashdi, u yerda raqiblaridan qochishga muvaffaq bo‘lgan Fer hisobni ochdi, 1:0.
Uchrashuvga qo‘shib berilgan daqiqalarda Gollandiya bu musobaqadagi eng kuchli quroli – qarshi hujumni qanday amalga oshirish kerak ekanini barchaga ko‘rsatib qo‘ydi. De Yong avvaliga raqibdan to‘pni olib qo‘ydi va qanotdan hujumni qo‘llayotgan Robbenga to‘pni uzatdi, Aren har doimgidek raqibdan qochib ketdi va jarima maydoni markaziga uzatma berdi, u yerda Depay chaqqon harakat qilib, hisobni 2:0 ga yetkazdi.
Shu tariqa o‘yin Gollandiya foydasiga yakunlandi, biroq Chili ham avvalgi 2 turdagi g‘alabalari evaziga ikkinchi o‘rindan pley-off bosqichiga yo‘llanmani qo‘lga kiritdi.
JCh — 2014“B” guruhi
Gollandiya – Chili 2:0 (0:0, 2:0)Gollar: 1:0 – 77 Fer, 2:0 – 90 Depay.Gollandiya – Silessen, Yanmat, de Vrey, Vlar, Blind, N. de Yong, Veynaldum, Sneyder (Fer, 75), Robben, Kyuyt (Kongolo, 89), Lens (Depay, 69).Chili – Bravo, Xara, Medel, Silva (Valdiviya, 70), Isla, Dias, Guterres (Bosejur, 46), Mena, Arangis, Sanches, Vargas (Pinilya, 81).Ogohlantirishlar: Silva (25), Blind (64).
Izoh (0)