O‘zbekistonlik FIFA referisi Braziliyada davom etayotgan futbol bo‘yicha JCh-2014da ikkinchi o‘yinga tayinlanuv oldi.
FIFA rasmiy sayti ma’lumotiga ko‘ra, Ravshan Ermatov “A” guruhi 3-tur doirasidagi Meksika – Xorvatiya uchrashuvini boshqaradi. O‘yin Toshkent vaqti bilan 24-iyunga o‘tar kechasi, soat 1:00 da boshlanadi.
“Kun” bergan ma’lumotga ko‘ra, Meksika – Xorvatiya uchrashuvida Ermatovga qanotlarda o‘zbekistonlik Abduhamidullo Rasulov va qirg‘izistonlik Bahodir Qo‘chqorov yordam beradi. To‘rtinchi hakam sifatida kamerunlik Alium tayinlangan.
Ermatov boshchiligidagi brigada bungacha JCh-2014 guruh bosqichi 1-tur o‘yinlari doirasida Shveysariya – Ekvador (2:1) o‘yinida ishlagan edi. O‘sha o‘yindagi harakatlari va qarorlari uchun o‘zbekistonlik referi WorldReferee.com sayti tomonidan JCh-2014 guruh bosqichi 1-turining eng yaxshi hakami deb topildi.
Meksika va Xorvatiya terma jamoalari o‘rtasidagi JCh-2014 «A» guruhi 3-tur uchrashuvi eng qiziqarli va muhim bahslardan biri hisoblanadi. Hozirgi vaqtda Meksika terma jamoasi hisobida 4, Xorvatiya hisobida esa 3 ochko bor. O‘yinda qaysi jamoa g‘alaba qozonsa, o‘sha pley-offga chiqadi, durang natija Meksika termasi foydasiga ishlaydi.
Shuningdek, ushbu guruhdan musobaqa mezboni Braziliya ham o‘rin olgan bo‘lib, uning hisobida ham 4 ochko bor va u so‘nggi turda autsayder Kamerunga qarshi bahs olib boradi. Mutaxassislar ushbu o‘yinda Braziliya terma jamoasi imkoniyatlarini yuqori baholashmoqda.
E’tiborli tomoni, Ermatov futbol bo‘yicha jahon chempionatlari final bosqichlarida Meksika terma jamoasi ishtirokidagi o‘yinni ikkinchi bor boshqarmoqda. Bungacha, Ermatov brigadasi JARda bo‘lib o‘tgan JCh-2010da Meksika va JAR terma jamoalari o‘rtasidagi ochilish o‘yinini (1:1) boshqarib borgandi. O‘sha musobaqada Ermatov jami beshta o‘yin (guruh bosqichida uchta, va bittadan chorak final, yarim final o‘yinlari)ni boshqargandi.
Izoh (0)