Jahon chempionati, “H” guruhi, ikkinchi turida Belgiya terma jamoasi Rossiyaga qarshi maydonga tushdi va kichik hisobda g‘alabaga erishdi, deya xabar beradi Uff.uz.
Uchrashuvdagi yagona golni 88-daqiqada Origi kiritdi. Lukakuning o‘rniga maydonga tushgan hujumchi Belgiya o‘yiniga rang-baranglik olib kira oldi.
Gol kiritilgan vaziyatda Rossiya terma jamoasi hujumga o‘tishda uquvsiz harakat qildi va Belgiya futbolchilari tezkor qarshi hujum uyushtirdilar. Origi to‘pni qanotdan jarima maydonchasiga kirib borayotgan Eden Azarga yetkazib berdi. Azar jarima maydonchasida ikki himoyachini ortda qoldirib, to‘pni yana qulay vaziyatga chiqqan Origiga qaytardi. Mahoratli hujumchi so‘nggi zarbada adashmadi va hisob 1:0.
Shundan so‘ng ham Belgiyada yana ikkita qulay imkoniyat bo‘ldi. Ammo so‘nggi zarbada aniqlik yetishmadi. Aksincha, hisobni tenglashtirishi lozim bo‘lgan Rossiya terma jamoasi birorta ham tayinli hujum tashkil qila olmadi. Shu tariqa Belgiya terma jamoasi haqli g‘alabaga erishdi va pley-off yo‘llanmasini naqd qilib qo‘ydi.
JCh-2014Belgiya – Rossiya 1:0 (0:0, 1:0)Gol: 1:0 – 88 Origi.Belgiya – Kurtua, Alderveyreld, Kompani, van Beyten, Vermalen (Vertongen, 31), Vitsel, Fellayni, Mertens (Miralyas, 75), de Bryuyne, E. Azar, Lukaku (Origi, 57).Rossiya – Akinfeyev, Kozlov (Yeshenko, 62), V.Berezutskiy, Ignashevich, D.Kombarov, Glushakov, Fayzulin, Samedov (Kerjakov, 90), Shatov (Dzagoyev, 83), Kanunnikov, Kokorin.Ogohlantirishlar: Glushakov (38), Vitsel (54), Alderveyreld (73).
Izoh (0)