17-iyun kuni bo‘lib o‘tgan Braziliya va Meksika o‘rtasidagi bahs bilan mundialning ikkinchi tur o‘yinlari boshlandi, deya xabar berdi “OlamSport”.
Ikkala jamoa ilk turda raqiblarini mag‘lub etishgani yodingizda bo‘lsa kerak. Ushbu o‘yinda g‘alaba qozongan jamoa keyingi bosqichga chiqish masalasini ijobiy hal qilishi mumkin edi. Biroq, jamoalar bir-biriga ochko ulashishni xohlamadilar.
Bahs ikkala tomonning ehtiyotkorligi bilan boshlandi. Ikkala jamoa ham hujumkor o‘yin namoyish etgan bo‘lsalar-da, asosiy qahramon Meksika darvozasini qo‘riqlayotgan Gilermo Ochoa bo‘ldi. Meksikalik futbolchilar asosan uzoq masofalardan darvoza tomonga zarba berishgan bo‘lsa, Braziliyaliklar o‘z raqiblarini har tomonlama sinovdan o‘tkazdilar.
Ikkinchi bo‘limning 69-daqiqada hisob ochilishi mumkin edi. Neymar yaqin masofadan darvozaga aniq va kuchli zarba berdi. Ochoa millionlab muxlislar ko‘z o‘ngida jasorat ko‘rsatdi va jamoasini muqarrar goldan saqlab qoldi. Shu bilan birga, 85-daqiqada jarima maydonchasiga uzatilgan to‘p bilan Tiago Silva 2 metrli masofadan, boshi bilan bergan zarbasi ham juda xavfli chiqdi. Bu safar ham Ochoa o‘z mahoratini namoyish etdi.
Shunday qilib, Braziliya—Meksika o‘yinida hisob ochilmadi. Shu tariqa, Braziliya 1978-yildan buyon ilk marta jahon chempionatida maydonni gol ura olmay tark etdi.
Izoh (0)