Jahon chempionati boshlanishi oldidan ko‘p bora tilga olinib kelingan Belgiya terma jamoasi ham mundialdagi birinchi uchrashuvini o‘tkazdi. Vilmots shogirdlari birinchi turda Jazoir terma jamoasi bilan bahs olib borishdi. Bu haqda “OlamSport” xabar berdi.
Birinchi bo‘lim afrikalik futbolchilarning faolligi va himoyadagi intizomli o‘yini bilan esda qoldi. Belgiyani yaqqol favorit deb bilgan muxlislar hayratda qolgan bo‘lishsa ajab emas. Birinchi bo‘limning 25-daqiqasida Fegulining 11 metrlik jarima zarbasini bexato bajarib, Jazoirni hisobda oldinga olib chiqishi yana bir kutilmagan holat bo‘ldi.
Ikkinchi bo‘limda Belgiya o‘z muxlislari oldida o‘yinda burilish yasashi kerak edi. Ketma-ket hujumlarni yog‘dirishni boshlagan Vilmots jamoasi Jazoir darvozasi oldida katta bosim uyushtira boshladi. Belgiyaliklar ustozi ikkinchi bo‘lim avvalida Mertens, keyinchalik Divok Origi va Fellayni kabi futbolchilarni maydonga tashladi. Aynan shu futbolchilar yordami bilan Belgiya o‘ziga bildirilgan ishonchni oqlay boshladi.
Uchrashuvning 70-daqiqasida Fellayni jarima maydonchasi ichida De Bruynedan ajoyib to‘p uzatishni kutib oldi va boshi bilan juda chiroyli tarzda Rais qo‘riqlagan darvozani nishonga oldi. Belgiya hisobni tenglashtirdi.
Uchrashuv yakunlanishiga 12 daqiqa vaqt qolganida de Bruynening jonbozligi tufayli Belgiyaning navbatdagi hujumi boshlandi. Ushbu hujumni Eden Azar rivojlantirdi va yakuniy zarbani Mertens aniq yo‘llab, jamoasini hisobda oldinga olib chiqdi — 2:1. Uchrashuv so‘ngiga qadar ushbu hisob o‘zgarmadi va Belgiya irodali g‘alabani tantana qildi.
Belgiyaning keyingi raqibi Rossiya terma jamoasi bo‘ladi.
Izoh (0)