Rossiya va Xitoy BMT Xavfsizlik Kengashida Suriyadagi ehtimoliy harbiy jinoyatlar bo‘yicha ishni Xalqaro jinoyat sudiga taqdim etishni ko‘zda tutuvchi rezolyutsiya loyihasiga veto qo‘ydi. Xavfsizlik Kengashining qolgan 13 a’zosi, jumladan uning doimiy a’zolari – AQSh, Fransiya va Buyuk Britaniya hujjat loyihasini qo‘llab-quvvatladi. Bu haqda Associated Press xabar berdi.
Ma’lum bo‘lishicha, Moskva va Pekin Suriya muammosi bo‘yicha to‘rtinchi marta veto huquqidan foydalangan. Fransiya tomonidan tayyorlangan bu galgi rezolyutsiya Suriya hukumati va Bashar Asad rejimi tarafdori bo‘lgan harbiylashgan guruhlarning inson huquqlari va xalqaro gumanitar huquqlarni buzayotganini qoralagan.
Rossiyaning doimiy vakili Vitaliy Churkin rezolyutsiya loyihasini Suriya muammosiga siyosiy yechim topishga halaqit beradigan “reklama hiylasi” deb atadi. “Rezolyutsiya qabul qilinganida, nizoga zo‘ravonlik bilan aralashuvga yo‘l ochilar edi”, - dedi u.
Churkin Suriya masalasi bo‘yicha muzokaralarni vaqtincha to‘xtatib turishni taklif qildi. O‘z navbatida, AQSh vakili “Rossiya Federatsiyasining Suriya rejimini qo‘llab-quvvatlash qarori tufayli Suriya xalqi hech qachon adolatdan yolchimasligi”ni ta’kidladi.
Ma’lumot o‘rnida: BMT Ustavining 27-moddasiga binoan BMT Xavfsizlik Kengashining doimiy aʼzolari veto huquqiga ega. Xavfsizlik Kengashida muhokama qilinadigan masalalar Kengash aʼzolarining bir fikrda boʻlishini talab qiladi. Ulardan birortasi muhokama qilinayotgan qarorning qabul qilinishiga rozilik bildirmasa, qaror rad qilingan hisoblanadi.
Izoh (0)