Toshkent metropoliteni ijtimoiy tarmoqlarda “Chilonzor bekatida poyezd to‘xtab qoldi” mazmunida tarqalgan xabarlarga munosabat bildirdi.
Qayd etilishicha, 1-aprel sanasi soat 11:48 larda metro yo‘nalishlarida qariyb 38 yildan buyon foydalanib kelinayotgan 21-sonli harakat tarkibining kompressori havo bilan taʼminlanishida qisqa uzilishlar kuzatilgan.
Shu boisdan, belgilangan yo‘riqnomaga asosan, mashinist tomonidan harakat xavfsizligini taʼminlash maqsadida yo‘lovchilar “Chilonzor” bekatiga tushirilgan. Shundan so‘ng ortdan kelayotgan boshqa harakat tarkibi orqali tirkamaga olingan holda tekshiruv yo‘lagi tomon yuborilgan.
Hozirgi vaqtda yo‘nalishda poyezdlar harakati belgilangan jadval asosida amalga oshirilmoqda.
Eslatib o‘tamiz, 2023-yil oktyabr oxirlarida Toshkent metropolitenining “Shahriston” metro bekatida poyezd tarkibi texnik nosozlik sabab to‘xtab qolgandi. Noyabr boshlarida esa Toshkent metrosida unutib qoldirilgan buyum poyezdlarning kechikishiga sabab bo‘lgani aytilgan edi.
Izoh (0)