Jizzax va Navoiy viloyatlarida noqonuniy yo‘llar bilan AQSHga ishlash uchun yuborishni va’da qilgan shaxslar qo‘lga olindi. Bu haqda Bosh prokuratura huzuridagi departament xabar berdi.
Qayd etilishicha, departamentning Zafarobod tuman bo‘limi tomonidan DXX xodimlari bilan hamkorlikda tezkor tadbir o‘tkazilgan. Tadbirda A.Q. ismli shaxs fuqaro B.B.ning ishonchiga kirib, uni tanishlari yordamida Amerika Qo‘shma Shtatlariga ishga yuborishi evaziga 20 ming dollarni olgan vaqtida ashyoviy dalillar bilan ushlangan.
Shu kabi departamentning Navoiy viloyat boshqarmasi va DXX xodimlari hamkorligida Navoiy shahrida o‘tkazilgan tezkor tadbirda S.T. ismli shaxs fuqaro M.Sh.ning ishonchiga kirib, uni Meksika davlati orqali AQSHga ishga yuborishi evaziga 14 ming dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
2023-yilning 20-dekabrida AQSHga noqonuniy yo‘llar bilan ketgan 119 nafar o‘zbekistonlik vatanga qaytarilgan edi. Shu yilning fevral oxirlarida esa AQSHga San Diego orqali 2500 dan ortiq o‘zbekistonlik noqonuniy kirgani to‘g‘risida xabar berilgandi.
Izoh (0)