Toshkent shahar Yunusobod tumanida o‘qituvchi erkak sobiq o‘quvchisini do‘stining oldida haqoratlab, tegajog‘lik qildi. Bu haqda shahar sudlari “Daryo”ga xabar berdi.
Ma’lum qilinishicha, 23-yanvar kuni ertalab S.I. o‘zining sobiq o‘quvchisini ko‘chada do‘sti bilan birga ketayotganini ko‘rib qolgan. U bundan g‘azablanib, voyaga yetmagan qizning yo‘lini to‘sib, uni haqoratlay boshlagan, telefonini olib qo‘yib, majburan mashinasiga o‘tqazgan.
Erkak o‘z qilmishini sobiq o‘quvchisiga nisbatan tuyg‘ulari borligi, unga uylanmoqchiligi, hatto uyiga sovchilar jo‘natgani (ish ko‘rilgan vaqtda qiz voyaga yetmagan bo‘lgan, uning manfaatlarini sudda onasi himoya qilgan) bilan izohlagan.
Sud majlisida jabrlanuvchining onasi erkakning bunday harakatlari birinchi marta sodir bo‘lmaganini aytdi. U ilgari ham ko‘p marta qiziga shunga o‘xshash harakatlarni sodir qilgani va qizini tinch qo‘ymaganini bildirgan. Shu sababli unga qilmishi uchun qonuniy jazo ko‘rilishini so‘radi.
Jinoyat ishlari bo‘yicha Yunusobod tuman sudi 2025-yil 5-mart kuni 1994-yil 30-avgustda tug‘ilgan S.I. Ma’muriy javobgarlik to‘g‘risidagi kodeksning 61-2-moddasi 1-qismi (mulkni qasddan nobud qilish yoki unga zarar yetkazish) hamda 183-moddasi (mayda bezorilik) bilan aybdor deb topdi va unga 5 sutka ma’muriy qamoq jazosi tayinlandi.
Bundan avval Toshkent shahrining Yakkasaroy tumanidagi rassomchilik maktabi o‘qituvchisi dars paytida o‘quvchi qizga shilqimlik qilgani uchun 5 sutkaga qamalgandi. Shundan so'ng Bolalar ombudsmani sud qaroriga protest kiritdi.
Izoh (0)