Respublika ixtisoslashtirilgan ona va bola salomatligi ilmiy-amaliy markazi Jizzax filialida chaqaloqni o‘g‘irlagan ayol ushlandi. Bu haqda viloyat IIB matbuot xizmati xabar berdi.
Ma‘lum qilinishicha, Zafarobod tumani Yorqin shaharchasida yashovchi ayol 28-yanvar kuni Respublika ixtisoslashtirilgan ona va bola salomatligi ilmiy-amaliy markazi Jizzax filialida o‘g‘il farzandni dunyoga keltirgan. 31-yanvar kuni taxminan kechgi soat 19:30 larda 25-30 yoshlardagi yuziga tibbiy niqob taqqan notanish ayol jabrlanuvchining xonasiga kirib, “bolangizni shifokor ko‘rigiga olib boraman” deb, chaqaloqni olib ketib qaytib kelmagan.
Olib ketilgan chaqaloq shu kunning o‘zida ichki ishlar organlari xodimlari tomonidan olib borilgan tadbirlar davomida topilgan. Ushbu chaqaloqni olib ketgan shaxs protsessual tartibda qo‘lga olingan.
Respublika ixtisoslashtirilgan ona va bola salomatligi ilmiy-amaliy markazi Jizzax filiali shifokorining “Millar” dasturiga ma’lum qilishicha, bolasi o‘g‘irlangan ayol egizak farzand — ikki o‘g‘ilni dunyoga keltirgan bo‘lgan. O‘g‘irlangan chaqaloq onasining bag‘riga, egizagining yoniga sog‘-salomat qaytarilgan.
Holat yuzasidan Jinoyat kodeksining 137-moddasi (odam o‘g‘rilash) bilan jinoyat ishi qo‘zg‘atilgan.
Izoh (0)